Соочени со густиот градски сообраќај и со смалување на просторот за маневрирање на транспортот, Nemo, заедно со браќата близнаци од Fiat и Peugeot, Fiorino и Bipper е создаден како идеално комерцијално возило кое умее да се протнува и со леснотија да се снаоѓа во пренатрупаните градски улици.

Малите надворешни димензии (должина 3,86 m) големиот простор внатре (корисен товарен простор од 2,5 m3 и носивост од 610 kg) му обезбедуваат на Nemo одлични карактеристики кои поврзани со современиот стил ќе одговорат на барањата на купувачите на мали градски транспортери.

Тука се вклопуваат и моторите, бензинецот и дизелот, кои со зафатнина од 1.4 литри успеваат да им побегнат на високите акцизни давачки воведени кај нас што е дополнителен стимул при одбирот на едно работно возило.

Моторите кои работат под хаубата на Nemo се проверени и познати и од порано. Bензинецот остварува максимални 75 КС, додека дизелот HDI нуди 70 коњи и згора на тоа се вбројува во еден од најеоколошките мотори во понудата на марката бидејќи остварува емисија на СО₂ од само 119 g/km.

Во верзијата Furgon, Nemo на нашиот пазар стартува со цена од 9.580 евра за 1.4 литарскиот бензинец опремен со: воздушна перница, ABS, серво волан, тонирани стакла и кодиран клуч.

Подеднакво опремен дизелот 1.4 HDI се добива за 11.320 европски банкноти. Секако цените се со платен данок на додадена вредност од 18%, информација важна за сите фирми кои имаат потреба од ваков тип на возила.