Иако звучи надмено, сепак со преку 3.2 милиони произведени теретни возила од кои голем дел се возат ден денес Canter е идеален комерцијален превозник.

Широката гама на Canter вклучува шасии од 3.5 до 7.5 тони бруто тежина, 4 типа на кабини и 4 мотори. Економичните, моќни и издржливи мотори ги исполнуваат нормите Euro 4.

Стандардната опрема на Canter опфаќа ABS, опција e само за верзиите од 3.5 тони, и диск сопирачки. Сопирањето е потпомогнато и од моторната сопирачка која доаѓа сериски кај сите изведби на Canter.

Mitsubishi Fuso во 3.5 тонскиот и 4.5 тонскиот Canter го нуди сопствениот 3.0 литарски четирицилиндричен турбо дизел во три различни изведби. Најслабата верзија остварува 110 КС и 255 Nm вртежен момент.

Следна е изведбата со 125 КС и 294 Nm, додека во најмоќната варијанта моторот остварува 145 КС и 362 Nm максимален вртежен момент.

Благодарение на директно вбризгување со common rail технологијата и променливата геометрија на турбо полначот и плус филтрите за честички чад, кривата на вртежниот момент кај сите три изведби е безмалку рамна од 1.700 врт/мин кога се остварува максималната вредност на вртежниот момент па се до 3.200 врт/мин кога моторот ја остварува максималната моќност.

Поголемите изведби на Canter од 6 до 7.5 тони ја користат најмоќната верзија на 3.0 литарецот со 145 КС и 362 Nm, додека врвот од понудата е загарантиран за 5.0 литарскиот четирицилиндарец кој како и помалиот мотор располага со директно вбризгување и common rail технологија, променлива геометрија на турбо полначот и филтер за честички чад и остварува моќни 180 КС при 2.700 врт/мин и мрсен вртежен момент од максимални 530 Nm при 1.600 врт/мин.

Во кабината се наоѓаат сите контролни индикатори кои упатуваат кога е дојдено времето за сервисирање на Canter. Нивото на моторното масло се проверува само со притискање на едно копче на инструмент таблата. Така се штеди време за дијагностицирање и во исто време се намалуваат трошоците.

Новите изведби на Canter нудат седум различни меѓуоскини растојанија што даваат многу предности како поголема товарна должина и помали димензии на возилото. Независно од варијантата карактеристични за Canter се малиот радиус на вртење и лесното маневрирање во тесните улици.

Промоцијата на Canter во Македонија стартуваше преку единственото roadshow за товарни и патнички возила кое го организираше застапникот МакАутоСтар. Ова roadshow стартуваше на 20. мај и завршува денес на 1 јуни и ја обиколи целата наша држава.

За време на настанот кој посети седум града низ Македонија беа претставени изведбите на Canter 7C15/3850 и 3C13D/3350. Возилата беа стандардно опремени со диск сопирачки напред и назад, електрика на стакла, моторна сопирачка, зајакнати амортизери, два акумулатори со голем капацитет, филтер за гориво со греење и сепаратор на вода и светла за магла и товарна хидраулична платформа одзади .

Гаранцијата на што ја дава Mitsubishi Fuso за Canter е 3 години или 100.000 km. Цените се познати кај застапникот и зависат од изведбата и желбите и потребите на купувачот.