За соодветно да ја одбележи годишницата на својот исконски модел Ford годинава планира серија од настани чија цел е да го потсетат светот на првиот големосериски автомобил во историјата.

Ford Model T претставува своевидна револуција во автомобилската индустрија бидејќи е првиот масовно произведуван автомобил со стандардизирани делови кој се продавал по ниска цена и бил лесно достапен до широките народни маси.

Податоците во Ford велат дека првиот Model T наменет за комерцијална продажба ги напуштил поризводните ленти точно на 1 октомври 1908. Кога сме кај производните ленти тие во Ford, на начин кој ни е познат денес, всушност почнале да функционираат дури во 1913. На Хенри Форд му биле потребни цели пет години додека своите идеи за масовно производство ги имплементира во стварност.

Првиот Model T имал четирицилиндричен бензински мотор кој остварувал 20 коњски сили доволни за максимална брзина од 72 km/h, тежел 544 килограми и имал потрошувачка меѓу 11 и 18 литри на 100 изминати километри.

Производството конечно запира на 26 мај 1927 со продукција од повеќе од 15 милиони автомобили за период од безмалку 19 години.