Аукциската куќа Brooklands организира аукција на кој ќе се појави еден навистина интересен автомобил Daimler DB18 Drophead Coupe од 1939 година кој му припаѓал на стариот лисец Винстон Черчил.

Јасно е дека легендарниот премиер на Велика Британија кој одиграл важна улога во одржувањето на државата во Втората светска војна знаел што да одбере за свое лично превозно средство.

Британскиот производител на луксузни и спортски автомобили Daimler во тоа време одлучил да произведе лимитирана серија од 23 примероци на луксузното купе/кабриолет DB18 Drophead Coupe, но тоа никогаш не се случило бидејќи во меѓувреме почнува Втората светска војна.

Место планираните 23 примероци Daimler успева да произведе едвај осум автомобили DB18 Drophead Coupe од кои четири настрадуваат при масовните бомбардирања на Бротанија од германската авијација, додека еден е делумно уништен и расклопен заради резервни делови.

Остануваат три примероци од кои на два им се губи трагата и ден денес не се знае ништо за нив. Така примерокот сопственост на Черчил којшто ќе се продава на аукцијата е единствениот познат Daimler DB18 Drophead Coupe.

Автомобилот не седел во гаража. Черчил го користел постојано во периодот меѓу 1944 и 1949 година, а од тоа време се сочувани и фотографии и филмски записи со британскиот премиер и неговиот DB18 Drophead Coupe.

Ова класично купе/кабриолет Daimler DB18 Drophead Coupe носи линиски шест цилиндричен бензински мотор со зафатнина од 2.5 литри и моќност од 70 КС. Моќноста се пренесува до задните тркала преку четири степен мануелен менувач, максималната брзина е 122 km/h, а забрзувањето до 100 km/h е за 17,9 секунди.

Brooklands ќе го изложува Daimler DB18 Drophead Coupe во својот музеј се до 4 декември кога купе/кабриолетот ќе биде понуден на аукција. Се очекува да достигне цена меѓу 200 и 250 илјади британски фунти.