Според извршниот директор на BMW, Норберт Рајтхофер, спортскиот оддел М ќе биде зафатен од новиот бран кој ја подигнува свесноста за заштита на животната средина.

Ова значи дека во иднина автомобилите на BMW со ознака М ќе носат мотори со помала зафатнина опремени со трубо полначи кои пак ќе овозможат високи перформанси со пониска потрошувачка и емисија на издувни гасови.

Постоечките 4.0 литарски V8 од М3 и 5.0 литарскиот V10 од М5 ќе бидат заменети со нови мотори, а промените се очекуваат веќе следната година.

Прв во рангот на М модели што ќе добие нов мотор е теренецот Х5. Токму така BMW подготвува М верзијата на Х5 во која место 5.0 литарскиот V10 ќе работи 4.4 литарски V8 бензинец потпомогнат од два турбо полначи.

BMW X5 M кој ќе послужи како опитно глувче за М5 веќе тестира на затворен полигон близу Минхен и неговата светска премиера се очекува на салонот во Женева. Заедно со него тестира и M верзија на Х6, но сеуште не се знае дали ќе се појави на пазарот заедно со Х5 М.  

Битурбото од 4.4 литри ќе остварува однаква моќност како и атмосферскиот 5.0. Односно возачот на располагање ќе има 507 коњски сили, но и значително поголем вртежен момент од преку 700 Nm остварливи на многу пониски вртежи отколу 520 Nm во М5 кои доаѓаат на 6.100 врт/мин.

Поради големиот вртежен момент забрзувањето, поточно катапулитрањето на М верзијата на Х5 до 100 km/h се очекува да биде далеку под 5 секунди, додека максималната брзина традиционално ќе биде ограничена на 250 km/h.

Сепак, намерата на инженерите во BMW не е постигнување на значително подобри перформанси во однос на атмосферскиот мотор, бидејќи тој има сосема доволно џус да го претвори големиот теренец Х5 во ракета на четири тркала.

Целта е да се намали потрошувачката и емисијата на издувни гасови што реално и се постигнува со новиот мотор вели информацијата добиена од извор од BMW.

Како дополнување на подигнувањето на еколошките перформанси на моторот ќе послужи и системот старт/стоп како и системот на BMW, EfficientDynamics.

Со новиот мотор М верзијата на Х5 ќе може равноправно да им се спротивстави на веќе втемелените играчи на пазарот во овој сегмент Porsche Cayenne Turbo и Mercedes ML63 AMG.