Концептот Aero-X го постави темелникот на новиот настап на марката Saab. Неговото влијание се препознава во неодамнешниот фејслифт на Saab 9-3, но уште повеќе ќе се забележува кај следната генерација на моделот.

Додека новата Opel Vectra веќе тропа на врата, нејзината роднина од Шведска штотуку почнува да се тестира по пробните патеки. Во моментов е тешко да се препознае за какво возило се работи. Шведските инженери користат проширена каросерија од сегашната Vectra, а оздола е механиката од новата платформа Epsilon 2. Сепак, седиштата и внатрешноста се од Saab.

Со пошироката платформа се постигнува повеќе простор за патниците во кабината што е пресуден фактот за успехот на новиот Saab 9-3. Додека Vectra ќе биде лимузина за широката народна маса, Saab ќе се позиционира повисоко и ќе им парира на Audi A4, BMW серија 3 и на класата C на Mercedes.

Прототипот што сега се тестира вози со погон на сите тркала, кој долго се очекуваше. Овој погон од есенва ќе го има и во актуелниот Saab 9-3. Марката се надева дека половина од продажбата ќе отпадне на верзиите со погон на сите тркала XWD. Ќе очекуваме и моќни мотори што работат со биогорива и нов мотор со двојно турбонатполнење. Saab ќе ја руши и границата од 300 коњски сили со новиот Turbo V6 кој се претпоставува дека ќе се појави уште во сегашниот 9-3.

Новата генерација од Шведска може да ја очекуваме кон крајот на 2008 година.