Rapide е фатен за време на тестирањата некаде околу поларниот круг, за да се испитаат влијанијата на зимските услови врз системите и комплетната структура на автомобилот.

Уловен скоро комплетно без камуфлажа протипот на Rapide всушност прикажува колку дизајнот на верзијата спремна за производство е близу до концептот претставен уште во 2006 на салонот во Детроит.

Дизајнерите во Aston Martin не сакале да измислуваат топла вода. Едноставно ги зеле најдобрите елементи од купето DB9 и ги поставиле на растегната платформа со поголемо меѓуоскино растојание и продолжена купола на кровот. Со преработката автомобилот не изгубил ништо од својата елеганција, напротив. Првиот впечаток е дека Rapide е многу поубав автомобил отколку конкурентот од Porsche, Panamera.

Покрај нискиот нос, за спортскиот лик се грижат и спојлерот интегриран во задната врата и дифузорот кој е дел од задниот браник, плус тука се и задолжителните отвори на предните крила кои го одведуваат жешкиот воздух од 6.0 литарскиот V12.

Големиот мотор ветува вртоглави перформанси и се претпоставува дека спринтот до темпо 100 не би требало да трае многу подолго од пет секунди. Максималната брзина пак би се доближувала до бројката од 300 km/h.

Како што е редот кај лимузините во Aston Martin работат на суспензија кој ќе пружа удобност, но во исто време ќе дава доволно потпора за спортско минување низ свијоци. Добрите возни својства ги ветува и лесната каросерија направена од алуминиум. Rapide би требало да биде многу полесен отколку 2 тона тешката Panamera.

По безмалку 20 години ова е првиот Aston Мartin со четири врати. Претходникот Lagonda која за првпат беше претставен уште во далечната 1975 до згаснувањето на производството во 1989 не успеа да ги привлече богатите од џетсетот пред се поради чудниот дизајн и лошиот квалитет.