Покрај концептите на Peugeot, Prologue и RC кои ги најавивме минатиот месец од HYmotion4 профитираат и концептите на сестринската марка Citroen како што се Hypnos и C4 WRC HYmotion4.

Погонот HYmotion4 е создаден за подеднакво да испорачува перформанси и ефикасност, две диајметрално спротивни категории кои прераснуваат во апсолутен предизвик за конструкторите ширум светот.

Според вредностите дадени од инженерите на PSA Peugeot Citroen, HYmotion4 е способен да постигне просечна потрошувачка од само 3,5 L/100 km додека во исто време нуди задоволство при возење кое го обезбедуваат преку 200 дизелски или бензински коњи и уште 50 до 100 електрични коњски сили.

Суштината на HYmotion4 е во комбинирањето на класичен мотор, дизел пред се, кој нуди ефикасност, моќност и голем вртежен момент со електричен мотор кој обезбедува економичен и чист превоз во градска средина при ниски брзини.

Со комбинирање направен е погон на четири тркала чива конфигурација ги елиминира примарните недостатоци на ваков тип на погон, а тоа се големите отпори при тркалање и големата тежина.

Сето ова е постигнато со разделување на функцијата на двата мотори. Имено моторот со внатрешно согорување е поставен напред под хаубата и ги задвижува предните тркала, додека електромоторот е поставен на задната оска и ги задвижува задните тркала. Или обратно.

На овој начин е елиминирана потребата од поставување на централен диференцијал, кардански вратила, диференцијал на предната и на задната оска и дополнителни полувратила.

Со исфрлање на сите овие паразитски механички делови и потрошувачи на енергија значително е намалена тежината на погонот и отпорите при тркалање од каде и доаѓа бројката за минимална просечна потрошувачка.

Секако улогата на примарниот погон ја превзема класичниот мотор со систем старт/стоп и шест степен мануелен или автоматски менувач. Електромоторт е секундарен, добива енергија од литиум-јонски батерии кои се полнат од работата на обичниот мотор и од регенерирање на енергијата при сопирање и забавување.

Во основа HYmotion4 претставува паралелен хибриден погон кој овозможува максимална тракција и проодност, а со тоа и безбедност, високи перформанси и ниска потрошувачка.