Пад во продажбата, незаинтересирани купувачи и силна конкуренција од трендовски ванови и спортски теренци - производителите треба да бидат или храбри или, пак, луди за да се плеткаат на европскиот пазар на семејни лимузини. Каков е тогаш Chevrolet?

Исто како што претходно направи Hyundai со Sonata и Kia со својот Magentis, фирмата на најпознатиот швајцарски иселеник го лансираше својот нов модел од средната класа, сега и со ново име, Epica. Големата лимузина од Кореја премиерно ја ѕирнавме на Салонот во Женева. И, како што е редот, во мај бевме поканети на презентацијата во Фрајбург, во Швајцарија. Би рекле, на домашниот терен на Chevrolet.

Во споредба со претходните лимузини развивани под знакот на Daewoo, Epica изгледа многу посериозно и посамоуверено. Новиот изглед на одбојникот и на маската е згоден, носот е ниско, опашката високо, нешто слично на Saab.

{shsmoothslideshow epica} 

Внатре автомобилот мами со алуминиумски детали, пластика мека на допир и дебел четирикрак управувач. Петмина внатре ќе собере без проблеми и за подолги патувања, седиштата се кожени во повисокото ниво на опрема, а патниците одзади имаат простор да ги прекрстат нозете ако сакаат.

Сепак, најинтересното достигнување со кое се перчат инженерите е под хаубата. Тука шест цилиндри пресуваат два или два и пол литри воздух, зависи колку ќе се плати. Убавината е во тоа што цилиндрите не се поставени да го маваат коленестото вратило од секоја страна, туку се наредени во линија. Исто како што практикува BMW. Со причина: линискиот шестцилиндарец е брилијантен со примерната смиреност во работата, придобивка од совршената избалансираност.

Придобивка е и слабата еластичност и задоцнетото будење на моторот: впрочем истото со што се соочуваа и возачите на последниот BMW 320i што возеше со шест цилиндри. За споредба, четирицилиндарската Opel Vectra 2.2 Direct со 155 КС забрзува од 80 до 120 km/h за 14,2 секунди, додека на Epica 2.0 за истото £ требаат 17,0 секунди.

Одлуката да се оди на шест се чини правилна, посебно што се забележува дека е вложено многу труд во звучната изолација на кабината. Со тоа сликата за комфорот во Epica е заокружена. На иста приказна оди и подвозјето, со хармонична работа и само повремено испуштање неартикулирани звуци на патиштата. Швајцарските.

Добро, колку пари чини ова? Ако ја почестиме Epica и ја споредиме со модел од кој инженерите се одушевувале при развојот, со BMW 320i, излегува дека Chevrolet е двојно поевтин: за Баварецот да се опреми со кожени седишта, алуминиумски бандажи, сензори за паркирање и за дожд, темпомат, аларм - што е во серија кај Epica 2.0 LT за 20.840 евра - треба да се издвојат цели 40.000 евра.

И, дали сега новодојденецот (кај нас го очекуваме наесен) ќе биде хит на пазарот на семејни лимузини кој е преполн со сопки? Искрено, не мислиме така, иако почетната цена од едвај 19.000 евра, грижливо склопената внатрешност и современиот надворешен дизајн, сигурно, ќе бидат подобро прифатени отколку кај моделите што £ претходеа на Epica. Ќе го оцениме настапот на Chevrolet во оваа класа во Европа како храброст - не како лудост.

CHEVROLET EPICA 2.0 (2.5)

Технички податоци

Мотор: шест цилиндри во линија, попречно · две брегасти оски во глава, 4 вентили по цилиндар · зафатнина 1.993 (2.492) cm³ · силина 105(115)kW / 144(156)КС при 6.400(5.800)/min · вртежен момент 195(237) Nm при 4.600(4.000)/min · петостепен мануелен менувач (петостепен автоматик со ман. програма) · мекферсон напред, мултилинк назад · сопирачки дискови напред/назад 278/276 mm, ABS · д/ш/в 4.805/1.810/1.450 mm · меѓуоскино растојание 2.700 mm · багажник 480 l · гуми 205/65 R16 (215/50 R17) ·  празно возило 1.460(1.500) kg · носивост 495 kg · резервоар 65 l · 0-100 km/h 9,9 s · Vmax 207(209) km/h · потрошувачка (EU-Mix) 8,2(9,2) l/100 km