Работите се менуваат, па така за CR-V се одлучуваат оние што знаат да препознаат квалитетен производ скроен од инженерите на една од технолошки најнапредните автомобилски марки. Воедно сакаат да се разликуваат и да отскокнуваат. Едноставно да бидат посебни.

Honda со последната генерација на CR-V како да цели токму кон нив. Со својот облик, но и со димензиите CR-V отскокнува од конкурентите. Оптичката лага лежи во заоблените линии на горниот дел од каросеријата која повеќе го претставува CR-V како голем караван отколку како SUV. Всушност каросеријата како да е споена од два дела, а пресекот е во појасот. Заоблен и мазен горен дел е насаден врз тело од масивни браници и прагови обвиткани со црна заштитна пластика и испакнати арки над тркалата. Дел од причината зошто телото на CR-V личи дека е од два дела лежи и во предницата каде маската се слева од хаубата како јазиче кое нагло е пресечено и со пластична решетка одвоено од браникот.

Печатот на теренец CR-V го добива преку масивните облоги од црна пластика која го штити подвозјето и лакот. Хром на предната маска, рачките на вратите и хромираните лајсни околу стаклата откриваат ексклузивност

Токму предницата буди измешани чувства и не е јасно дали е чудна, грда или можеби привлечна. Или пак, можеби се одеднаш. За вкусовите не вреди да се расправа, но личи како дизајнерите да снемале сили токму кога требале да дадат најмногу и да се доискажат. Без оглед на се носот на CR-V е препознатлив и го прави значително поразличен од конкуренцијата.

Honda вели дека CR-V на нишан ги држи комби верзиите на седаните од средната класа не сличните SUV модели. Оттука и комплетно новата стратегија во создавањето на актуелниот модел. CR-V лежи релативно ниско, примарниот погон е напред – задните тркала помагаат само кога ќе се јави потреба, а неговата основна намена е удобно совладување на километрите на пат, не надвор од него.

Пластична полица го дели големиот багажник. Практично кога треба да се одвои товарот. Полицата е цврста и може да издржи товар тежок до 10 kg.

Сместувањето зад волан не бара алпинистички вештини, сепак, се седи малку повисоко, доволно за чист преглед на патот. Возачката позиција се наоѓа лесно и е одлична. Високо поставената рачка од менувачот ја олеснува работата на десната рака. Седиштата се цврсти и комфорни. Грбот нема да почувствува замор дури и ако се заборавите од возење. Простор во кабината има во изобилство. Подот е рамен и дополнително ја нагласува пространоста. Дури и кога напред седат натпросечно високи луѓе патниците одзади сеуште можат да ги прекрстат нозете. Задната клупа лизга по должина, потпирачите го менуваат аголот, а доколку затреба преклопувањето е лесно и отвора голем товарен простор.

Моторот добива чиста петка. Работи мирно, спремно одговара на педалот за гас без оглед на режимот на работа и постојано ја нагласува жедта за вртежи. Тука се препознава инженерингот на Honda. Колку повисоки вртежи толку подобро. Вистинскиот полет се чувствува дури кога стрелката на бројачот за вртежи ќе се сврти преку 4.500 врт/мин. Ова го потврдува максималниот вртежен момент од 192 Nm кои се остваруваат при високи 4.200 врт/мин.

Задоволство што нема да го цени џебот на сопственикот. Динамичното возење драстично ја зголемува потрошувачката која не оди на рака со практичната намена на CR-V. Тогаш која е потребата еден SUV да се вози динамично. Прво не оди со карактерот на возилото, а второ со есапот за бензин.

Доколку само малку се опушти десното стапало и се подразмисли за карактерот на CR-V тогаш се отвора сосем нова димензија. CR-V се претвора во совршен партнер за долги опуштени патувања каде бркањето на брзински просек нема поента.

Најдоброто што може да го понуди CR-V е опуштено возење. Тогаш се чувствува како безшумно лизга по асфалтот, а патниците уживаат во патувањето. Патем и сметката за бензин е значително пониска и во просек се движи до 20% над рамките наведени од производителот.

Не треба да се очекуваат чуда надвор од пат. Малиот клиренс дозволува возење по чакал колку да се стигне до омиленото излетничко место. Теренските предизвици треба веднаш да се исфрлат од глава. Подвозјето одлично ги впива нерамнините. Минувањето преку удрани дупки не се чувствува, ниту се слуша. Одлично се изолирани и воланот и менувачот. Вибрациите отсуствуваат дури и кога се вози надвор од асфалт. Ова од една страна е добро. Од друга страна отсуството од повратни информации како да го дигитализира воланот и возачот незнае што се случува со предните тркала.

Јасно е дека поради високата каросерија и тежината од преку 1.7 тони полн, CR-V не е автомобил кој може да се форсира на змијулест пат со нагли менувања на правецот. Но, и бездруго тоа не е неговата основна намена. Сепак, не значи дека со CR-V неможе брзо да се напредува по свијоци. Тој не сака нагли менувања на правецот. Доколку возачот го води флуидно тогаш работите се менуваат и CR-V може да приреди позитивно изненадување.

Во секој случај CR-V победува кога е потребен брз и удобен превоз на патници и нивниот багаж. Заминувањето на викенд, годишен одмор или скијање, CR-V ќе го претвори во релаксирачка авантура. Него ќе го обожуваат и децата и возрасните. Посебно ако се земе предвид дека со својата појава игра на карта на подигнување на имиџот на својот сопственик.

CR-V е избалансиран автомобил со безбедни возни својства при чие создавање во Honda се откажале од перформансите и се определиле за практичност и комфор. Нуди многу простор, богатство од опрема (на Executive му недостасува стаклен кров и кожа на седишта), висок квалитет на обработка и имиџ кои ја оправдуваат цената.

Основна цена: 30.990 евра

Сериска опрема: ABS + EBD,  електронска контрола на стабилност VSA со можност за исклучување на терен, 6 воздушни перници, автоматски двозонски клима уред, централна брава со далечинско, радио со CD + МР3, светла за магла, темпомат, електрика на стакла, електрика на ретровизори со греење и склопување, кожа на волан + рачка од менувач, леснометални банадажи со дијаметар од 17 инчи и гуми 225/65.