Најновата ракета на четири тркала која ја создадоа инженерите на G Power е базирана на BMW M6 Coupe и сега го носи името својствено за тјунерот, Hurricane M6 CS.

Под хаубата на Hurricane M6 CS работи легендарниот V10 на BMW познат по гладта за вртежи кому експертите од G Power му вградија два механички компресори и постигнаа моќност од 750 КС и максимален вртежен момент од 800 Nm.

Максималната снага V10 ја остварува меѓу 7.500 и 8.000 врт/мин, додека максималниот вртежен момент е расположив на 5.000 врт/мин. Сето ова е доволно автомобилот тежок 2 тона да спринтува до 100 km/h за 4,4 секунди, до 200 km/h за 9,6 секунди, до 300 km/h за 26 секунди и да достигне максимална брзина од малку преку 370 km/h.

Со помош на механичките компресори ASA T1-316 кои секој за себе полни еден од двата блока цилиндри, волуменот на воздух по цилиндер може да се зголеми до 25% што теоретски би давало снага од 900 КС, но ова останува предизвик за во иднина.

За да се издржи зголемувањето на моќноста на 750 КС и да се намали сериската компресија, заради натполнењето, вградени се специјални клипови од Mahle кои ја намалуваат компресијата и воедно се значително полесни, но посилни од сериските. Паралелно се сменети и клипните лостови, летечките лежишта, чивиите и кариките.

Hurricane M6 CS стои на леснометални бандажи од 19 инчи обуени во гуми Pilot Sport PS2 со димензии 255/35 напред и 305/30 назад кои ги обезбедува Michelin. Ова се единствените гуми на пазарот кои се способни да поднесат толкав стрес.

За секојдневно возење Hurricane M6 CS носи леснометални бандажи од 21 инчи и гуми со димензии 255/30 напред и 295/25 назад кои не смеат да се возат побрзо од 340 km/h.

За сопирање на Hurriсane M6 CS се грижат карбон-керамички дискови со дијаметар од 380 mm и напред и назад кои ги зафаќаат шест клипни сопирачки клешти.

Сето ова е поддржано со соодветен аеродинамичен кит и специајлно одбрани бои, а сопственикот да се чувствува уште попосебно, внатре, Hurricane M6 CS има тахо кое е изгравирано до 400 km/h.

И за крај најважното. Hurricane M6 CS може да се порача од G Power како комплетен автомобил, а стартната цена за мераклиите е одредена на 360.000 евра па угоре, во зависност од желбите.