Таква е тјунерската куќа Mansory, која се специјализирала за едни од најлуксузните марки на светот Bentley и Rolls Royce.

Откако го преработија кабриолетот на Bentley, Continental GTC, во Mansory ги засукаа ракавите и својата магија ја префрлија на луксузниот седан, популраниот Phantom на Rolls Royce.

За своето ново издание на Conquistador инженерите додале светлечки диоди кои ги заменуваат дневните светла за возење, ги издолжиле линиите на препознатливата маска и додале нови странични завеси со вметоци од алуминиум.

Поставен е и нов заден браник со дупли една над друго поставени цевки од издувот, плус спортски спојлер интегриран во задниот капак.

Внатрешноста вришти во нова црна кожа и среберени детали како замена за стандардниот хром. Остатокот од кабината е прекриен со панели од карбон-фибер и од алкантара и има монитори монтирани на наслоните од предните седишта.

Внимание е посветено и на механиката која бележи зголемување на зафатнината на моторот на импресивни 7.5 литри и соодветна моќност од 543 КС и вртежен момент од 810 Nm.

Финалето го красат леснометални бандажи од 22 инчи кои скриваат масивни дискови производ на Brembo со шест клипни сопирачки клешти напред и сопирачки клешти со четири клипа од зади.