Карактеристично за сите изведби R-Design на Volvo е спуштеното и поцврсто подвозје и препознатливиот аеродинамичен кит за каросеријата, додека перформансите остануваат на ниво на стандардните верзии.

Од надвор XC60 R-Design се разликува по мат сивиот метален финиш на кровните шини, ретровизорите, праговите, рамките на отворите за воздух во предниот браник, заштитата на задниот браник и хромираните издувни цевки.

Леснометалните бандажи со пет пречки наречени Cratus исто така се карактеристични за моделите од линијата R-Design на Volvo. Не е исклучок ниту XC60 кај кого сериски тие мерат 18 инчи, но со доплата се добива сет од 20 инчи.

Друга измена во надворешниот дизајн се браниците и страничнита заштита  обоени во боја на каросеријата, место црниот мат финиш кој ја краси стандардната верзија на XC60.

Кога е во прашање доработката на подвозјето инженерите за кај XC60 R-Design се одлучиле на еден интересн потег. Додека останатите модели од серијата R-Design имаат спуштено и стегнато подвозје кај XC60 суспензијата е само поцврста.

Инженерите во Volvo не го спуштиле возилото, но сепак поцврстите пружини и амортизери му овоможуваат на XC60 R-Design подобро да се носи со свијоците и да има подобри динамички карактеристики.

Темата со мат финиш на деталите од каросеријата продолжува и во кабината на XC60 R-Design. Воланот, облогите на вратите, арматурата и централната конзола се украсени со детали од четкан алуминиум.

Алуминиум е искористен и за педалите, додека седиштата се преслечени со кожа во две нијанси. Воланот е обложен со перфорирана, а во центарот е изгравирано неизбежното лого на R-Design. Истото се наоѓа и на предната маска.

Останатите детали за Volvo XC60 R-Design, фотографиите од внатрешноста и цената ќе се знаат по претставувањето во Франкфурт.