Она што е предмет на интерес кај секој љубител на автомобили кога ќе се спомене Alfa е нејзинот срце, поточно моторот. Во MiТo GTA ќе работи нов турбо бензинец со зафатнина од 1.750 cc кој ќе има директно вбризгување и ќе испорачува 230 коњски сили на предна оска.

Тоа се далеку повеќе од 175 коњски сили на главниот ривал Mini Cooper S и се доволни за да ја забрзаат MiТo GTA за 6,5 секунди до 100 km/h и да и овозможат максимална брзина од 240 km/h. Импресивно нели!

Де Мео исто така истакнува дека MiТo GTA ќе има меѓузабрзување од 80 km/h до 120 km/h кое е на ниво на една Alfa 8C Competizione која орбитира во класата на супер спортски автомобили.

Променета е и геометријата на суспензијата кој дополнително е спуштена и стегната и оди на рака со системот DNA на Alfa кој на сопственикот му овозможува да избере еден од три модуси за возење, а за MiТo GTA ќе биде специјално модификуван за во спортскиот модус да овозможи уште подинамички возни својства со поостар одзив на педалот за гас и на воланот.

И бидејќи во MiТo GTA 230 коњски сили се испорачуваат само на предна оска ќе биде вградена модификувана верзија на системот Q2 кого го има и 147 GTA, а функционира како електронска блокада на диференцијалот, активирајќи ја сопирачката на внатрешното предно тркало додека се забрзува при излегување од тесен свијок со што се подобрува тракцијата и нема непотребно пролизгување.

Сопирачките исто така ќе бидат модификувани и ќе нудат уште поголема моќ на сопирање, коjа и кај обичната Alfa MiТo се граничи со фантастика сопирајќи го автомобилот од 100 km/h до 0 за само 34 метри.

Стилски MiТo GTA ќе се разликува по надуваните арки над тркалата, нови преден и заден браник, поголем спојлер на кров и поголеми тркала од лесен метал со карактеристичен дизајн.

Малечкиот спортист на Alfa треба да пристигне во продажните салони некаде во 2009, најверојатно во втoрата половина на годината, а цената би требало да стартува од околу 23.000 евра.