Тестното муле на најмоќната „тројка” на Audi е уловено како напорно тестира на најпеколната патека на светот Нирбургринг и се подготвува да го маѓепса светот кога ќе пристигне за околу две години.

Најмоќната „тројка” во најдобрата традиција на спортистите на Audi ќе ја носи ознаката RS, под хаубата ќе пакува моќни 335 КС и ќе биде создадена на основата на новата генерација на Audi A3 која пристигнува в година.

Audi планира новата генерација на А3 да ја претстави идната есен на салонот на автомобили во Франкфурт, а следната 2012 ќе го претстави и RS3. Јасно е дека очекувањата Audi да го направи RS3 на основа на сегашниот модел и со тоа достоинствено да ја испрати актуелната генерација на А3 нема да се остварат.

Она што е сигурно е дека актуелната најмоќна „тројка” S3 послужила како тестно муле за пеколниот RS3.

Што се сокрива под ламарината на навидум обичниот S3 Sportback го откриваат новиот преден браник со сплитер и огромни отвори за воздух во стил на моделите со ознака RS, големите леснометални бандажи и широките гуми со екстремно низок профил, надуваните арки над тркалата и функционалниот дифузор одзади.

Под хаубата на RS3 ќе работи пет цилиндричниот битурбо бензинец со зафатнина од 2.5 литри познат од Audi TT-RS и преку седум степен менувач со две спојки кон сите четири тркала ќе испраќа 335 КС и максимален вртежен момент од 450 Nm.

Според предвидувањата Audi RS3 би требало до 100 km/h да забрзува за не повеќе од 4,5 секунди и да достигнува максимална брзина од преку 260 km/h, а која електронски ќе биде ограничена на 250 km/h.

Со создавањето на RS3, Audi сака да ја прошири гамата на новиот А3 и да го зголеми интересот на купувачите за овој модел што директно ќе влијае на зголемување на продажбата.

Вториот дел од планот е да се создаде реална конкуренција на најмоќниот најмал модел на производителот од Минхен, BMW Серија 1 М кој исто така е на пат да ги освои срцата на зависниците од брзина и да го разбуди детето во возачот.