Концептот го носи името Sportback, веќе користено од Audi за верзијата на А3 со пет врати. Sportback во случајов не е само преглед на конечниот изглед на А7, туку е преглед на дизајнот на идните автомобили што ќе излегуват од погоните во Инголшатд.

Со своите 4,95 m должина, 1,93 m ширина и 1,4 m висина, А7, пардон Sportback, влегува во сегментот не премиум лимузини, нуди доживување на купе и се подготвува да биде сериозен противник на Mercedes CLS.

Задвижувачката сила кај Sportback доаѓа од познатиот 3.0 литарски V6 TDI кој своите 225 КС и 550 Nm вртежен момент ги испраќа до сите четири тркала преку седум степениот Tiptronic менувач и перманентниот погон Quattro.

Без оглед што Sportback тежи 1.800 kg, успева да фати темпо 100 за помалку од 7 секунди и да достигне максимална брзина од 245 km/h. Во Audi истакнуваат дека во просек Sportback троши 5,9 литри дизел на 100 изминати километри и има коефициент на отпор на воздух Cd 0.30.

Новиот стајлинг на Sportback, воедно и на Audi забележува нова предна маска, заоблена линија на кровот, отсечен задник, аглести предни светла кои обилно користат LED технологија и нова линија на појасот со раменици како кај врвен атлета.

Внатре најголемо изненадување претставува едноставната и елегантна арматура, кокпитот е свртен кон возачот, а екранот на кој се отчитуваат менијата на MMI системот излегува над отворите за вентилација при стартување на автомобилот.

Кабината на Sportback нуди доволно простор за удобен превоз на четири патници, а багажникот со своите 500 литри волумен може да ја собере нивната комплетна опрема потребна и за подолги патувања.

Една од поголемите иновации кај Sportback е комплетно новата конструкција на предната оска која е направена по принципот мулти линк со пет независни водилки.

Совршеното лежење на пат и впивање на нерамнините го обезбедува системот CDC Continuing Damping Control или континиурана контрола врз амортизацијата со помош на амортизери кои имаат магнетна контрола врз флуидот што работи во нив.

Тука е и електронското серво управување, асистентот за паркирање, карбон-керамички дискови кои ги зафаќаат сопирачки клешти со шест клипа и леснометални бандажи со пречник од 21 инчи.

Сериската верзија на Sportback, или А7, се очекува да се појави на пазарот во првата половина на 2010, а премиерата би требало да се случи на салонот во Франкфурт на есен годинава.