Најголемите производители на луксузни автомобили BMW и Mercedes бележат значителен пад во продажбата. Причината лежи во намалениот интерес на купувачите од САД и земјите од Западна Европа.

Продажбата на Mercedes во октомври бележи пад од 21%. Интересно е што во исто време Smart бележи раст на продажбата од 6,5%. Падот на продажбата на BMW е помал. Баварците запишуваат минус од 9,2% за октомври.

Пад на продажбата бележи и Mini иако со 3,4% падот е значително помал од оној на принципалот BMW. Експертите во BMW претпоставуваат дека падот на продажбата на Mini е поради очекувањата на купувачите за освежената кабрио изведба која е најавена за почетокот на 2009.

И додека во BMW и Mercedes загриженоста полека почнува да расте Audi го нема тој проблем. Изненадувачки, но Audi во текот на октомври не ја почувствува кризата.

Ова важи и за целата 2008 поради што голема е веројатноста Audi да ги оствари своите планови и годината да ја заврши со 1 милион продадени возила.

Продажбата на Audi во текот на октомври бележи раст од 7,2%. Пазарите кои најмногу допринеле за растот на Audi во овој критичен месец се Кина и Италија.

Со завршувањето на октомври производителот од Инголштад на купувачите им испорачал 844.700 автомобили со што вкупната продажба во текот на годината забележала раст од 3,3%.

„И покрај лошата економска состојба ние газиме по зацртаниот пат во текот на 2008 и очекуваме годината да ја завршиме со 1 милион продадени возила,” изјавува шефот за продажба на Audi, Петер Шварценбауер.