Веќе стана вообичаено производителите на автомобили да ги отповикуваат продажбите на своите возила и да ги повикуваат во сервис заради отстранување на одредени недостатоци.

Најмногу отповикувања има кога е во прашање безбедноста на патниците. Најнов проблем од ваков вид го снајде BMW, поточно неговата Серија 1 кај која предзатегнувачите на сигурносните ремени можат да предизвикаат пожар.

Од BMW информираат дека се станува збор за премалку клиренс меѓу предзатегнувачите на ремените и материјалите за изолација кои се наоѓаат околу нив.

Во случај на судар кога предзатегнувачите ќе се активираат се создава висока температура од која може да се запалат материјалите за изолација кои се поставени многу блиску до нив.

Според изданието Consumer Reports, BMW веќе повлекува дел од Серија 1 од продажба и воедно ги повикува сопствениците во сервис. Оваа грешка се јавува кај сите модели на Серија 1 произведени меѓу јануари и мај 2010, но и на одредени модели произведувани од 2008. Најпогодени се верзиите Coupe и Cabrio.

Инженерите на BMW сеуште истражуваат како најефикасно да се отстрани грешката и додека се работи на случајот им сугерираат на дилерите да ја отстранат изолацијата околу предзатегнувачите.

Од BMW истакнуваат дека незнаат кога повторно ќе стартуваат со продажба на Серија 1, но тоа би било наскоро. Во меѓувреме сопствениците ќе почнат да добиваат и официјални писма за да заминат во сервис.