Станува збор за Х5 задвижуван од познатиот 2.0 литарски четири цилиндричен дизел на BMW сега опремен со два турбополначи со променлива геометрија, кого го надополнува електричен хибриден систем.

Ова е уште еден дизел-хибрид во низата што ќе биде изложен во Женева и е пример дека штедливите дизели се повеќе ќе ги гледаме спарени со ефикасните хибридни системи.

BMW својот Vision дизел-хибрид го надополнува со осум степен автоматски менувач и соларни панели сместени на кровот кои работејќи заедно му овозможуваат да постави нови репери за економичност и емисија на издувни гасови.

Бројките што ги дава BMW за својот EfficientDynamics Vision велат дека големиот SUV во просек троши 6,5 литри дизел и има емисија на СО₂ од 172 g/km. Радува и фактот дека овие бројки не се постигнати на штета на перформансите на овој Х5.

Моторот остварува 204 коњски сили и максимален вртежен момент од 400 Nm, а хибридниот систем дополнува 20 коњски сили и вртежен момент од 210 Nm при забрзување. Па така се добива забрзување до 100 km/h од прифатливи 8,9 секунди.

Хибридниот систем на Vision користи компактен електромотор-генератор врзан директно за менувачот кого со струја го напојуваат литиум-јонски батерии сместени во багажникот.

Понатаму возилото користи енергија и од технологијата Brake Energy Regeneration или регенерирање на енергијата од сопирањето со која се полнат литиум-јонските батерии и енергија добиена од фотоволтажни ќелии или соларни панели, како што споменавме претходно, сместени на кров.

Подолу на рентегенски прикажаната слика се гледаат системите што се инкорпорирани во Vision и нивната поставеност во возилото.