Претставувањето во Пекинг беше логичен избор поради огромната заинтересираност за Cayenne на пазарите во Азија. Претходната генерација на Cayenne Turbo S се перчеше со моќни 520 коњски сили, снага која беше за околу 16 проценти поголема од онаа на Cayenne Turbo.

Но, тоа е веќе минато бидејќи новиот Turbo S до тркалата испраќа дури 550 коњски сили и максимален вртежен момент од мрсни 750 Nm расположиви од 2.250 до 4.500 вртежи во минута, а сето тоа доаѓа од 4.8 литарскиот V8 кој сега има нов издувен систем со зголемен проток и комплетно нова управувачка електроника.

За новиот Cayenne Turbo S е обезбеден пакетот SportPlus кој нуди леснометални бандажи од 21 инчи, ексклузивна сребрена метална боја и карбон-керамички дискови досега резервирани само за суперспортските модели како 911 Turbo и GT2.

Моќните сопирачки со дискови пречник од 410 милиметри напред кои ги зафаќаат шест клипни клешти и дискови со пречник од 370 милиметри назад со четири клипни клешти назад се доволно моќни без никаква драматичност да ја сопрат залетаната грдосија.

Cayenne Turbo S ги катапултира патниците до темпо 100 за 4,8 секунди и им овозможува удобно да патуваат со максимална брзина од 280 km/h, а кога сето ова ќе им здосади се упатува на прошетка во природа каде покажува завидни теренски способности.

Хипер теренецот стартува со продажба во август по цена од 111.400 евра.