Всушност со продажба стартуваше верзијата со пет врати, додека за моделот со три врати ќе треба да се почека до крајот на јули. Aveo е најпродаваниот модел на Chevrolet во Европа и опфаќа 28% продажбата на марката. На второ место е Lacetti со 21% од вкупната продажба на Chevrolet на Стариот континент.

Наследникот на Aveo има комплетно нова внатрешност и сега наликува на седанот, додека однадвор се сменети предната маска која сега има поголеми отвори за воздух, а преместена е и позицијата на знакот на Chevrolet.

Сменети се и предните светла, а како стилски детал додадени се и странични отвори за одвод на топол воздух од моторот кои се позиционирани во подножјето на A носачите. Одзади Aveo исто така го красат нови светла и нов браник со отвори за две издувни цевки во поопремените верзии.

Според инженерите на Cehvrolet голем напредок е направен во подигнување на квалитетот на материјалите во кабината и квалитетот на изработка во однос на претходникот.

Нови се и моторите. Купувачите ќе можат да бираат меѓу два бензински агрегати со зафатнина од 1.2 и 1.4 литри со моќност од 85 и 101 коњски сили и вртежен момент од 114 односно 131 Nm.

Моторите сега се помоќни и поефикасни и од Chevrolet наведуваат просечна потрошувачка од 5,5 и 5,9 литри на 100 километри безоловен бензин.

Цената во Европа за Aveo со пет врати стартува од 9.000 евра.