Британецот Стив Матин е назначен за главен дизајнер на рускиот автомобилски гигант AvtoVAZ и почнува со преродба на ликот на автомобилите на компанијата со почетокот на октомври годинава.

Пред да ја добие оваа тешка задача полна предизвици Стив Матин работел во студијата за дизајн на Mercedes и на Volvo и под негова раководна палка се создадени А Класа на Mercedes и моделите XC60 и S60 на Volvo.

Стив Матин е роден во Велика Британија во 1964 година и дипломира дизајн на универзитетот во Ковентри во 1987 година и веднаш добива работа во тогашниот DaimlerChrysler.

Покрај дизајнот на А Класа учествувал и во создавањето на модели како S Класа, SL, ML и GL. Од 2005 до 2009 година работи во Volvo каде раководи со проектите што веќе ги наведовме.

Претседателот на AvtoVAZ, Игор Комаров е исклучително горд што успеале да го придобијат Стив Матин за шеф на дизајн.

„Првпат го сретнав Матин во март месец во Женева. Сметам дека ангажирањето на дизајнер од светска класа ќе игра главна улога во идниот развој на најголемата автомобилска компанија во Русија,” изјави Комаров.

„Се надевам дека работењето со тимот на AvtoVAZ ќе ми даде можност да создадам дизајнерски јазик кој ќе послужи како основна за сите идни модели на марката Lada.”

„Првиот чекор е откривање на ново дизајнерско студио на AvtoVAZ во Москва на есен,” изјави Матин по назначувањето да биде шеф на дизајн на рускиот гигант.