Големата побарувачка на глобално ниво за третата генерација на најпродаваниот хибриден автомобил на планетата Toyota Prius е причина зошто премиерата во Македонија доцни околу една година.

Секако во контекст на најновите случувања околу софтверскиот проблем со сопирачките на Prius неговото задоцнето појавување на македонскиот пазар претставува предност бидејќи кај автомобилите кои се пристигнати кај нас грешката е отстранета.

Веќе пишувавме за третата генерација на Prius, исто така пишувавме и за плановите на Toyota да претстави цела низа на модели кои ќе почиваат на платформата на Prius која воедно ја користи и новиот хибриден компакт на Lexus.

Сега ќе претстaвиме една нова страна на Prius.

Денес Prius е најеколошкиот фамилијарен автомобил на пазарот со просечна емисија на CO₂  од 89 g/km и е предводникот во хибридната гама на Toyota која пак на глоблано ниво учествува со 80% од вкупната продажба на хибриди.

Воедно со стаж од 12 години од лансирањето на првата генерација, Prius, заедно со останатите хибриди на Toyota допринел во намалување на CO₂ за вкупно 9 милиони тони.

Со просечна потрошувачка од 3,9 L/100 km, и ниската емисија на СО₂ Prius ги надминува строгите Euro 5 норми, но тоа не е единствениот напредок на полето на зачувување на животната средина.

Toyota го зема предвид и целиот животен циклус на Prius со цел да го намали неговото вистинско влијание врз животната средина. Тоа е возможно со развој на технологија на нулта отпад и значителна редукција на употреба на испарливи органски соединенија кои допринесуваат за ефектот на стаклена градина, го уништуваат озонот и ја загадуваат животната средина.

Фабриката Цуцуми во Јапонија каде се произведува Prius е една од најеколошките во светот. Mеѓу 2003 и 2007 еколошкиот траг на фабриката беше намален за 21% од отпадот, 48% од испарливи органски соединенија, 14% од водата и 36% од емисијата на CO₂.

Интересно е што во тек на својот животен циклус Prius емитира 37% помалку CO₂ од конвенционалните бензински автомобили со дволитарски мотор и 47% помалку канцерогени азотни оксиди NOx од неговите дизел еквиваленти.

Понатаму 95% од компонентите на Prius можат да се обноват, а 85% да се рециклираат. Вградените компоненти од еколошка пластика овозможуваат дополнително намалување на траговите од јаглероден двооксид во атмосферата.

Еколошките влијание на хибридните автомобили конечно почнаа да го ценат и властите во Македонија ослободувајќи ги од плаќање акциза.

Затоа кај нас Prius стартува со цена од 26.490 евра во која покрај хибридниот погон влегува и високото ниво на опременост кое ретко каде се добива кај останатите конвенционални автомобили како сериска опрема.