Неколку седмици пред отворањето на салонот во Франкфурт, Ferrari одлучи да го отвори својот 458 Italia со симнување на тврдиот кров и поставување на склоплив исто така тврд кров претворајќи го во Spider.

Без оглед што нуди поинакво задоволство при возење, Ferrari побрза да објасни дека 458 Spider е истиот технолошки бисер на четири тркала како и купето задвижуван од амтосферскиот 4.5 литарски V8 кој на задна оска испраќа 570 КС.

Исти остануваат и менувачот со две спојки, електронски управуваниот диференцијал со интегриран систем за контрола на тракцијата F1 – Track и можноста за мапирање на педалот за гас и амортизацијата по свој терк.

Сето ова условува максимално возачко задоволство кое во случајот е надополнето со возење со ветар во коси и со ново дизајнираниот звук на моторот кој целосно ги опчинува возачот и сопатникот.

Цврстиот склоплив кров комплетно е изработен од алуминиум и според инженерите на Ferrari нуди неколку предности во однос на традиционалниот мек склоплив кров.

Како прво тие ја наведуваат тежината која во случајот е намалена за 25 килограми во однос на купето и кусото време потребно за отворање - склопување кое е измерено на само 14 секунди.

Кровот целосно е интегриран во стилот на автомобилот и кога е отворен е уредно спакуван пред просторот за мотор и не ја нарушува аеродинамиката или перформансите на автомобилот.

Мали измени претрпел задниот дел од автомобилот заедно со хаубата за да се оптимизира струењето на воздухот и полнење на моторот со воздух како и негово разладување и разладување на менувачот и спојката.

Малиот простор потребен за да се спакува им овозможил на дизајнерите да отворат доволно место зад седиштата за багаж за двајца. Комфорот дополнително е подигнат со електричниот ветробран одзади.

Кога е подигнат обезбедува комфорно возење и нормална конверзација при брзини поголеми од 200 km/h. Максимумот се достигнува кога бројките ќе се свртат до преку 320 km/h, а спринтот до темпо 100 трае помалку од 3,5 секунди.

Цената останува непознаница се до премиерата во Франкфурт, a танцот на кровот може да се пголедне на официјалното видео објавено и на YouTube каналот на Vozi!.