Спортското одделение на Honda подготвува цел список на компоненти со кои сопствениците ќе можат да го модификуваат својот нов спортски хибрид CR-Z, но се чини дека тоа е само дел од приказната.

Имено подготовките во Mugen се однесуваат на нов аеродинамички кит за CR-Z, модификации на суспензијата и акцентирање на детали во внатрешноста. Сето ова сопствениците на CR-Z ќе можат да го купат дополнително кај дилерите на Honda.

Mugen за сега нема да го чепка моторот и хибридниот погон на CR-Z.

Причината за ваквото оградување е подготовката на Type R верзија на CR-Z која како и останатите спортски изедби на моделите на Honda ќе нуди лути перформанси потпомогнати со соодветен визуелен настап.

Honda со најавениот CR-Z Тype R сака да докаже дека и хибридите можат да бидат подеднакво спортски автомобили колку што се штедливи. Така кај CR-Z Тype R можат да се очекуваат аеродинамички додатоци изработени од карбон-фибер.

Понатаму, замена на панели на каросеријата со полесни како што се хаубата или предните крила кои исто така ќе бидат изработени од карбон-фибер, одбир на посебна палета на бои и леснометални бандажи со поголем дијаметар.

На списокот измени треба да се додадат и спортското подвозје и спортскиот издув кој покрај подигнувањето на перформансите на бензинскиот мотор ќе придонесе и за соодветна звучна кулиса.

Се очекува моќноста кај CR-Z Тype R од пристојните 124 КС да биде подигната на серизони 170 КС со зголемување на снагата на бензинецот и со поставување на помоќен електромотор.

Трите модуси на работа познати од обичниот CR-Z би требало да се задржат и кај Тype R исто како и шест степениот мануелен менувач познат од европската верзија на CR-Z. Најверојатно варијабилниот автоматскиот менувач со континуиран преносен однос нема да го најде своето место во CR-Z Тype R.

Пристигнувањето на CR-Z Тype R се очекува некаде на средина на 2011, или отприлика една година откако обичниот CR-Z ќе стартува со продажба на европскиот пазар.