Купето следствено го носи и името Genesis Coupe и покрај шпекулациите дека можеби корејците ќе го задржат на старото име Hyundai Coupe. Исто така ставен е крај и на шпекулациите дека под хаубата ќе работи моќниот V8 од генерацијата Tau што веќе работи во лимузината Genesis.

Моторната понуда во Genesis Coupe стартува со 2.0 литарскиот турбо бензинец со четири цилиндри кој до задните тркала испорачува 212 коњски сили. Вториот и помоќен мотор е 3.8 литарскиот атмосферски V6 од генерацијата Lambda кој остварува снажни 306 коњи доволни за спринт до 100 km/h за помалку од 6 секунди.

Моторите се врзани со три менувачи. Шест степен мануелен кој сериски се испорачува и кај двете верзии, потоа пет степен автоматик кој оди со 2.0 литарецот и шест степен автоматик кој оди во 3.8 литарскиот V6.

Сериските диск сопирачки со пречник 320 милиметри напред и 315 милиметри назад по желба на купувачот можат да бидат заменети со поголеми од Brembo со пречник од 345 милиметри напред и 330 милиметри назад кои ги зафаќаат четири клипни сопирачки клешти исто така од Brembo.