Hyundai ја претстави новата генерација на популарниот седан Accent. Новиот автомобил под името Verna под кое е познат на пазарите во Азија за првпат и беше прикажан на јавноста на салонот во Пекинг.

Новиот малечок седан на Hyundai е поголем од својот претходник и нуди многу простор во внатрешноста. Од Hyundai сеуште не ги наведуваат димензиите на Verna, но затоа истакнуваат дека багажникот има зафатнина од 454 литри.

Под хаубата на новата Verna ќе работат два бензински мотори од 1.6 и 1.4 литри. Помоќниот остварува 121 КС при 6.300 врт/мин и вртежен момент од максимални 155 Nm при 4.200 врт/мин.

Послабиот 1.4 литарец остварува 106 КС при 6.300 врт/мин и максимален вртежен момент од 135 Nm при високи 5.000 врт/мин. И двата мотори и припаѓаат на новата Gamma генерација двигатели на Hyundai кои ги користи и новата Sonata, a се планираат и за новата Elantra.

Двата мотори имаат континуирано варијабилно управување со всисните и издувните вентили Continuously Variable Valve Timing – CVVT, a помалиот остварува порсечна потрошувачка од 5,7 L/100 km ако е спарен со 5 степен мануелен менувач или 6,2 L/100 km четири степениот автоматик.

Двата менувачи стојат на располагање и на помоќниот мотор, а снагата се пренесува на предните тркала. Внатре Verna користи квалитетни материјали и полуксузно уредување од својот претходник.

На почеток Hyundai ќе ја понуди Verna исклучиво на кинескиот пазар. Подоцна следува комерцијализацијата за домашниот пазар во Јужна Кореа, а за околу две години се очекува Verna, односно Accent да пристигне на пазарите во Европа.