Јапонскиот производител Mazda објави дека стартува со така наречена зелена револуција со која планира драстично намалување на емисиите на издувни гасови посебно на вредностите на јаглероден диоксид.

Инженерите на Мazda наведуваат дека во просек нивото на јаглероден диоксид што ќе го испуштаат најпопуларните модели на марката Mazda 3 и Mazda 6 ќе се симне под 120 g/km CO₂.

Сето ова нема да се случи преку ноќ. Проектот треба да заврши во 2015 кога најчистите верзии на Mazda 3 и Mazda 6 ќе имат емисија на СО₂ помала од 100 g/km.

Доколку навистина им успее на инженерите на Mazda тоа значи дека марката ќе ја спушти емисијата на CO₂ кај своите модели за 30%. Воедно за иста процентуална вредност ќе биде намалена и потрошувачката.

Во срцето на ниската потрошувачка и ниската емисија на СО₂ лежи новата технологија на Mazda наречена Skytech која што се однесува на нивните мотори, за што веќе пишувавме.

Новите Skytech мотори комплетно изработени од алуминиумска легура ќе бидат полесни, побрзо ќе се загреваат, ќе имаат ново развиена електронска програма за менаџмент и ќе бидат опремени со системот i-stop на Mazda кој всушност е еквивалент на вообичаените системи Start/Stop од останатите производители.

Новите мотори ќе бидат спарени со нова менувачка кутија со шест степени на пренос. Се работи за автоматски менувач кој благодарение на намалувањето на внатрешните отпори, тежината и подобрувањето на управувачката електроника само по себе овозможува заштеда на гориво и пониска емисија на СО₂ за 5%.

Во Mazda работат на симнување на тежината и на други компоненти што на крај треба да услови со намалување на тежината на новата генерација на Mazda 3 и на Mazda 6 за 100 kg по модел.