Новата Е Класа се води под кодна ознака W212, а со својот аглест дизајн треба да ги разбуди мемоарите за своите претходници, големите седани на Mercedes од 80. и 90. години на минатиот век.

Ако се суди според она што се гледа на фотографиите може да се заклучи дека дизајнот на новата Е Класа е прилично добар. Дизајнерите успеале во својата намера да го доловат изгледот на минатото во една современа форма.

Сеуште нема детални информации за автомобилот, бидејќи се работи за протечена информација, а не за официјално претставување, затоа и фотографиите се со слаб квалитет.

Сепак, извори блиски на компанијата откриваат дека под хаубата ќе работат модернизирани агрегати од постоечката палета, но и дека на повидок се два сосем нови мотори.

Основната верзија на Е Класа ќе биде задвижувана од 1.8 литарскиот четири цилиндричен бензинец потпомогнат од механички компресор кој ќе остварува 184 коњски сили.

Врвот од понудата на Е Класа ќе го претставува верзијата E63 AMG со модификуван турбо бензинец V8 кој од зафатнина од 6.2 литри ќе истискува 550 коњски сили. Доволно за да се спротивстави на M верзијата на BMW Серија 5.

Новите мотори ги претставуваат еден бензинец и еден дизел. Она што се знае за нив е дека бензинецот има директно вбризгување и распоред на цилиндри V6, а дизелот е V8 и за него се претпоставува дека ќе остварува моќност од преку 350 коњски сили.

Отприлика една година по појавувањето на Е Класа на пазарот паралелно ќе се појави и комби верзијата и нов хибрид кој ќе ја носи технологијата позната од S400 BlueHybrid, но ќе биде за нијанса помоќен и позелен.