Mercedes за претстојниот салон на автомобили во Детроит најавува хибриден погон со дизел мотор во својата Класа Е. Заедно со него ќе биде претставен и хибридниот бензинец од класата Е.

Првиот хибрид ја носи ознаката Е300 BlueTec Hybrid и има хибриден систем составен од новиот 2.2 литарски турбо дизел со 204 КС и 500 Nm и електричен мотор со моќност од 27 КС и 250 Nm.

Со активиран хибриден погон Е300 BlueTec Hybrid до 100 km/h стигнува за 7,5 секунди и вози со максимални 240 km/h. Ако се споредат податоците со BMW ActiveHybrid 5, хибридната класа Е со 109 g/km има за 40 g/km пониска емисија на СО₂.

Просечната потрошувачка е измерена на 4,2 l/100 km, а  енергијата за електромоторот доаѓа од литиум-јонски батерии со капацитет од 0,8 kWh што е доволно за 1.6 километри возење само на електричен погон.

Вториот хибрид е Е400 Hybrid кого го задвижува 3,5 литарскиот V6 кого го користат и останатите модели на Mercedes, податоците за него сеуште не се откриваат, но затоа се знае дека ќе се продава само на пазарот во САД.

И двата хибриди располагаат со технологија за штедење на гориво како систем Start&Stop, гуми со низок отпор при тркалање, систем за регенерирање на кинетичката енергија и систем за т.н. едрење кога при висока патна брзина спојката го исклучува моторот од погонот и штеди енергија.

Повеќе детали Mercedes ветува по премиерата во Детроит.