Моделите ќе бидат поставени на платформата врз која почива В Класа и според најавуваната техника што ќе се вградува во нив ќе бидат ултра чисти. Секако нивната зелена технологија се огледува и во дизајнот.

Првиот модел е наречен BlueZero E-Cell. Станува збор за електричен автомобил кого го задвижува електромотор со моќност од 100 kW или 136 коњски сили и максимален вртежен момент од 320 Nm. Моторот енергијата ја добива од литиум-јонски батерии.

Со полнење на батериите од само 2 часа BlueZero E-Cell ќе може да мине 100 km. Автономија е многу мала, но во Mercedes ја бранат со фактот што се работи за исклучиво градски автомобил.

BlueZero E-Cell е предвиден да биде втори или трет автомобил. Сите оние што ќе сакаат да возат надвор од границите на градот ќе можат да одберат еден од преостанатите два модели BlueZero E-Cell Plus и Blue Zero F-Cell.

BlueZero E-Cell Plus ја користи истата техника како и BlueZero E-Cell. Значи литиум-јонски батерии и електромотор од 100 kW. Меѓутоа предноста на BlueZero E-Cell Plus е што под хаубата сокрива и мотор со внатрешно согорување.

Станува збор за познатиот три цилиндричен турбо бензинец кој се вградува во Smart и кој во BlueZero E-Cell Plus служи како генератор. Негова еднинствена намена е да произведува струја со која се полнат литиум-јонските батери кои пак го задвижуваат електромоторот.

На овој начин автономијата на BlueZero E-Cell Plus се развлекува на одлични 600 km. Еквивалент на автомобилите со класичен бензински мотор.

Третиот зелен автомобил е Blue Zero F-Cell. И него го задвижува истиот електричен мотор со моќност од 100 kW и вртежен момент од 320 Nm. Разликата во однос на Blue Zero Е-Cell и Blue Zero Е-Cell Plus е што потребната енергија за задвижување на електромоторот се добива од горивни ќелии.

Покрај новата технологија со концептите BlueZero, Mercedes, стихијно го најавува и дизајнот на новата В Класа која се очекува да пристигне во 2010.