Екстравагантниот дизајн, отсуството на В носач, големите тркала и високо издигнатата каросерија повеќе го доближуваат Qazana до тврдокорните теренци отколку до некаков урбан кросовер каков што се стреми да биде.

Иако личи големо и страшно како некое баги спремно да вози по пустелиите и дините на Марс, Qazana всушност е многу компактно возило долго 4.060 mm, широко 1.780 mm, високо 1.570 mm и со меѓуоскино растојание од 2.570 mm.

Токму димензиите откриваат дека Qazana одлично ќе се снаоѓа во урбаната џунгла. Кусите превиси, надуваните крила, тесната половина и испакнатите раменици доловуваат изглед на вистински атлета.

На прв поглед во око паѓаат четирите предни светла и масивниот штитник за моторот вкомпниран во предниот браник со огромни отвори за довод на свеж воздух.

Но, и контрастот меѓу тркалезните светла поставени на браникот кои се задолжени за средно и долго светло и тенките ленти на хаубата кои користат како светло за возење дење.

Дополнителен шмек на тркалезните светла дава и сознанието дека личат како да се земени на заем од некој рели автомобил. Се чини дека спортската нота се проткајува и во внатрешноста.

Централната конзола на која е поставена рачката од менувачот е слиена со потпирачот за раце ги следи контурите карактеристични за седиштето и резервоарот за гориво на некој спортски мотоцикл.

На огромниот дисплеј на средина од арматурата се прикажуваат сите функции и податоци врзани со возилото вклучуваји го тука и активирањето на погонот на четири тркала.

Ниско поставените отвори за проветрување кажуваат дека Qazana навистина сака да биде посебен и доколку се постави прашањето: Зошто е тоа така? Qazana едноставно одговара: Зошто да не.

Според најавата на одговорните од Nissan, Qazana е исклучително важен модел за компанијата. Сериската верзија нема да го менува името и ќе носи дел од иновативните технологии на концептот.

За Nissan, Qazana е модел што цели кон иднината и ги застапува начелата на јапонската марка да производува уникатни, возбудливи и спортски ориентирани возила. Ниту фотографирањето покрај велосипед не е случајно.

Затоа без оглед што се наоѓаме на почетокот од годината со нетрпение ја очекуваме 2010 и Nissan Qazana.