Американската фирма за тјунинг Mach7 Motorsports која го смени името во Falcon Motorsports во Детроит го претстави своето најново чедо Falcon F7 кое влегува на голема врата право во прва лига.

Со шасија која претставува просторна рамка изработена од цевки од легура на алуминиум и зацврстена со карбон-фибер и каросерија комплетно изработена од овој лесен и цврст материјал на вага мери 1263 килограми.

Централно во шасијата лежи чудовишниот 7.0 литарски V8 од генерацијата LS7 кого Chevrolet го вградува во Corvette. Но, за потребите на Falcon F7 тјунерите малку си поиграле за да му ја зголемат моќноста.

Со поставување на нов вшмукувачку тракт со зголемен проток и комплетно изработен од карбон-фибер и со нова управувачка единица се остварени 620 КС при 6.600 врт/мин и 793 Nm при 5.400 врт/мин.

Моторот е спарен со шест степен мануелен менувач на Ricardo кого го користеше и Ford за својот суперспортист, GT, и заедно му овозможуваат на Falcon F7 да спринтува од 0 до 60 mph, или 96 km/h за 3,3 до 3,6 секунди.

Максималната брзина е околу 200 mph, или 320 km/h, а контролта над автомобилот ја воспоставуваат суспензијата пушрод со поддесувачки амортизери и масивните сопирачки.

Напред се поставени вентилирачки и жлебени дискови од 380 mm кои ги зафаќаат шест клипни сопирачки клешти. Принципот е задржан и за назад, но дисковите се помали од 355 mm, а келштите имаат четири клипа.

Продажбата стартува веднаш. Во оптек се три веќе произведени примероци чија цена стартува од 200.000 долари, до крајот на годината се планирани уште десет. Изложениот примерок веќе е продаден на бизнисмен од Њујорк.

Falcon Motorsports планира годишната продукција да остане во границите до 20 примероци заради задржување на ексклузивноста.