Новиот знаменосец на KIA, ќе го носи името VG и е продолжение на темата зададена од концептот KND-5 кој беше претставен пролетва на салонот за автомобили во претстолнината на Јужна Кореа, Сеул.

KIA VG ќе го замени веќе остарениот Opirus кој во целост не ги исполни продажните очекувања, но затоа му овозможи на корејскиот производител да ги научи се што е потребно за да се освојат купувачите на големи лимузини.

Иако ги следи смерниците поставени од концептот KND-5, KIA VG нуди далеку посмирен дизајн, што може да се забележи од првите официјални фотографии, но сеуште е доволно агресивен што е дијаметрално спротивно од дизајнот на Opirus.

Секако ова на VG му дава значителна предност во однос на претходникот. Со должина од 4.945 mm, ширина од 1.850 mm, висина од 1.475 mm и меѓуоскино растојание од 2.845 mm застанува рамо до рамо со Класа S на Mercedes.

Секако во KIA се свесни дека без оглед на димензиите атакот не е наменет кон знаменосецот од Штудгарт и неговите конкуренти.

Под хаубата на KIA VG ќе работат два мотори. Станува збор за атмосферски бензинци. Еден V6 од генерацијата Lambda на Hyundai чија моќност сеуште се таи и еден четирицилиндарец кој е новина во групацијата има зафатнина од 2.4 литри и остварува околу 200 КС.

KIA не сака да ја одолговлекува комерцијализацијата на својот знаменосец. Затоа продажбата на домашниот пазар стартува кон крајот на годината, додека во Европа ќе пристигне на почетокот на 2010.

Цената сеуште е непозната, но според зборовите на одговорните за продажба во KIA таа ќе биде поволна за еден олкав автомобил.