Bentley одлучи да објави нова серија на фотографии од Continental Supersports Convertible, најбрзиот кабриолет што некогаш излегол од погоните на легендарниот производител на автомобили.

Серијата фотографии е направена во Cојузната американска држава Колорадо, во околината на Гренд Кањон со цел да се привлече вниманието на американските купувачи кои традиционално се едни од најверните клиенти на Bentley.

Во Bentley очекуваат дека Continental Supersports Convertible ќе наиде на многу поклоници во САД, пред се во Калифорнија. Причината лежи во можноста да користи и биогориво, односно биоетанол Е85 и да ги задоволи строгите норми за емисија на издувни гасови кои важат во Калифорнија.

Колку за потсетување Continental Supersports Convertible е создаден на основата на купето Continental Supersports кој пак е директен дериват на Bentley Continental GT Speed.

Под хаубата на Continental Supersports Convertible работи монструозниот W12 од 6.0 литри кој благодарение на двата турбо полначи остварува 630 КС доволни за максимална брзина од 325 km/h

Continental Supersports Convertible е способен до 100 km/h да спринтува за 4,2 секунди импресивен резултат за 2.395 kg тешкиот колос. За сопирање се грижат вентилирачки и бушени карбон-керамички дискови со дијаметар од 420 mm напред и дијаметар од 356 mm назад.

Continental Supersports Convertible стои на леснометални бандажи со пречник од 20 инчи и ширина од 9,5 инчи обуени во гуми на Pirelli, Ultra High Performance со димензии 275/35.

Она што од Bentley го најавуваат како особеност за Continental Supersports Convertible се боите. Кабриото покрај прво претставената Сатенска Бела боја, или White Satin, се нуди и во следните бои: St James Red - Сент Џејмс црвена, Silver Tempest - Олујно Сива и Citric – Лимун.

Цената на Bentley Continental Supersports Convertible стартува од 227.000 европски банкноти, се разбира нето и без посебни желби од купувачот.