Сопственоста италијанците ја обезбедуваат со купување на 67%, наспроти најавените 70%, од акциите на Zastava, додека останатиот пакет на акции од 33% сеуште и припаѓа на државата Србија, досегашниот соственик на фабриката за автомобили.

Секако станува збор за Zastava Автомобили, додека одделот за производство на оружје наречен Zastava Оружје останува државна соственост.

Со потпишаниот договор меѓу претставникот на Fiat и претставникот на владата на Србија продолжува полувековната традиција на соработка меѓу Fiat и Zastava која датира од 1950. години на ХХ век и стартуваше со производство на Fiat 600.

Плановите на Fiat се во Zastava покрај автомобили да произведува и товарна и транспортна програма која доаѓа од Iveco, исто така сопственост на Fiat, и се очекува од погоните во Крагуевац покрај автомобили да излегуваат и камиони и автобуси.

Како што беше договорено во мај, Fiat ќе инвестира 700 милиони евра во нов производствен капацитет кој ќе произведува два нови модели. Се претпоставува дека едниот од нив е најавениот Topolino.

Капацитетот на погоните во Zastava постепено ќе се зголемува и во 2011 фабриката годишно би требало да ја напуштаат по 200.000 автомобили.

Покрај инвестицијата на Fiat од 700 милиони евра со договорот државата Србија се обврзува да инвестира 200 милиони евра во обновување и доградба на инфраструктурата околу фабриката.

Како што истакнуваат во Fiat и во Zastava потпишувањето на договорот е само логичен след на настаните и обновување на соработката која според нив никогаш и не била престаната.

Секако ниту едните ниту другите не сакаат да го споменуваат периодот од 1990. години од ХХ век кога соработката меѓу двете компании престана поради санкциите што ги воведоа Обединeтите Нации кон Србија, поточно, тогашна Југославија.