Pininfarina го разви автомобилот поставен на платформата на оригиналниот Rolls Royce Drophead Coupe за некој приватен колекционер чие име се држи во најстрога тајност.

Интересно е што ова е првиот уникатен автомобил создаден од Pininfarina по креирањето на уникатната супер спортска егзотика за Џејмс Гликенхаус во 2006, поставена на основата на Ferrari Enzo и наречена Р4/5.

Дизајнот на овој уникатен Rolls Royce има призвук на класичните автомобили на марката кои се произведуваа пред Втората светска војна што била и желбата на мистериозниот нарачател.

Ништо кај овој автомобил не е направено случајно. Се чини дека нарачателот е заљубен во историјата и митологијата. Името Hyperion доаѓа од грчката митологија и е име на еден Титан.

Hyperion по прикажувањето на Конкурсот на елеганција во Пеблбич ќе биде изложен и на претстојниот салон во Париз во октомври.

Механиката сеуште останува непозната, но претпоставка е дека Hyperion ќе го задржи серискиот 6.75 литарски V12, кој работи под хаубата на Rolls Royce Drophead Coupe, и остварува 453 коњски сили и 720 Nm вртежен момент, доволни за спринт до 100 km/h за 5,6 секунди и максимална брзина електронски ограничена на 250 km/h.