Најспортскиот седан на планетата мора да замине во сервис заради грешка со предните седишта. Погодувате станува збор за Porsche Panamera која ја добиле 3.176 среќни, но загрижени клиенти.

Porsche не сака ништо да препушти на случај и затоа во сервис ги повикува сите модели на Panamera што до сега биле испорачани. Според производителот од Цуфенхаузен се работи за доста сериозен дефект врзан за предните седишта.

Среќа до сега не е регистриран ниту еден инцидент со Panamera, но од Porsche истакнуваат дека во случај на судар проблемот со седиштата може да доведе до сериозни повреди па дури и смрт за возачот и совозачот.

Во официјалното известување кое го упати Porsche наведено е дека кога предните седишта се во крајна предна позиција, безбедносните ремени не работат според строгите стандарди кои ги пропишува компанијата за своите возила.

За да работат максимално безбедно во сите услови неопходно е во предните седишта да биде интегриран уште еден елемент кој ќе ја гарантира максималната безбедност независно од позицијата на седиштата.

Од Porsche не наведуваат за каков елемент станува збор, каде се вградува и прецизно каде е грешката. Единствено уверуваат дека за поправката се потребни 15 минути и дека целиот сервис е бесплатен.

Дополнително сите 3.176 примероци на Panamera ќе добијат и комплетна бесплатна контрола. За секој случај.