Француско јапонската алијанса Renault-Nissan најдоцна до есен следната година ќе поседува контролен пакет на акции во рускиот автомобилски гигант АvtoVAZ откриваат одговорните во компанијата.

Според Игор Комаров, претседателот на AvtoVAZ, во моментот меѓу акционерите се водат преговори кои се одвиваат многу успешно и доколку се оди како до сега најверојатно ќе биде постигнат договор.

Комаров уверува дека зделката со која Renault-Nissan ќе имаат контролен пакет на кации нема толку да се одрази на продажбите на Renault и на Nissan во Русија колку што ќе помогне за развој на автомобилите на AvtoVAZ.

Воедно со развојот на автомобилите на рускиот гигант ќе се постигне и подобра продажба како на домашниот пазар така и на останатите пазари ширум светот. Во моментот Renault-Nissan имаат блокирачки пакет на акции при гласање.

Но, во иднина по превземењето на контролниот пакет на акции, руската државна компанија Ростехнологии која поседува најголем дел од акциите во AvtoVAZ ќе биде таа со блокирачки пакет на акции при гласање.

Информациите дека Renault-Nissan сакаат да го купат AvtoVAZ не се нови и не претставуваат изненадување бидејќи како и тогаш така и сега шефот на алијансата Карлос Гон најавува вкупни инвестиции од околу 2 милијарди долари.

На тој начин комплетно ќе се модернизираат погоните до 2015 година кога од производните ленти ќе се симнуваат по 1.6 милиони автомобили годишно на трите партнери, а воедно ќе се произведуваат и мотори на концернот.