Skoda го чуваше својот адут за на крај. Откако заврши салонот во Франкфурт чешката марка одлучи да го претстави својот градски автомобил којшто е создаден врз основата на Volkswagen Up!.

Малечкото на Skoda ќе го носи името Citigo, не City Car како што се веруваше, и што е најважно не претставува концепт туку финален производ кој на пазарот во Чешка ќе биде понуден кон крајот на годината.

Од Skoda не сокриваат дека Citigo е идентичен со Up!, но сепак, дизајнерите се потрудиле да му поклонат нови предни светла, маска и браник носејќи го дизајнерскиот печат на марката.

Нов браник има и одзади, додека задните светла имаат поинаква оптика од Up!, иако ја задржале формата. Интересно за разлика од малечкото на VW, малечкото на Skoda ќе се нуди и со три и со пет врати. Димензиите исто така се идентични.

Под хауба работат истите мотори со моќност од 60 и 75 КС. Со нив Citigo во просек троши 4,5 и 4,7 l/100 km, додека верзија Green Tec со 4,2 l/100 km ќе биде поштедлива. Citigo нема да се нуди во изведба со која работи на компримиран природен гас CNG.

Skoda сеуште не ги објавува цените на Citigo, a на останатите пазари во Европа ќе почне да го пласира постепено низ првата половина на следната година.