Францускиот пилот во рели кој годинава му беше тимски другар на осумкратниот светски шампион во рели Себастијан Лоеб, откако беше отпуштен од Citroen си најде место за в година во тимот на VW.

Себастијан Ожие и неговиот совозач Жулиен Инграсија се првиот екипаж на Volkswagen кој во 2013 година го започнува своето патешествие во Светскиот шампионат во рели со своето Polo R WRC.

Во текот на следната 2012 година Ожие и Инграсија ќе работат на развојот на автомобилот за рели на VW и ќе ја пропуштат натпреварувачката сезона. Сепак, нивното искуство ќе биде од голема помош за тимот на VW.

Развојот на Polo R WRC почнува веднаш и Ожие седнува зад волан веднаш да тестира на патеките за рели ширум светот предвидени за оваа намена. Со ова паѓаат во вода најавите дека Ожие в година ќе го придружува Јари-Мати Латвала во Ford.

„Volkswagen е број 1 во Европа, а наскоро и во светот и сигурен сум дека ќе дадат се од себе и ќе се стремат да ги освојат титулите во Светскиот шампионат во рели,” изјави Ожие по потпишувањето на договорот.

„Горд сум што толку брз и успешен екипаж како Себастијан Ожие и Жулиен Инграсија се согласи да биде дел од тимот на Volkswagen во рели и цела година да работи на развојот на автомобилот,” истакна директорот на Volkswagen Motorsport Крис Нисен.

„Моите желби и напори ќе бидат силно насочени Polo R WRC да се извади на вистинскиот пат и да стане конкурентен автомобил којшто ќе може да се бори и да освојува многу победи и титули,” заврши на крајот Нисен.