Шефот на дизајn на Audi, Штефан Зајлаф, којшто е одговорен за ликот на модели како Audi A1, Audi A7 Sportback и Audi Q3, преминува во Volkswagen и пред него е поставена многу сложена задача.

Зајлаф почнува со работа на новото работно место на 01.01.2012 година каде ќе раководи со дизајнерскиот центар на Volkswagen во Потсдам и воедно ќе биде шеф на дизајн за ентериери на целата групација Volkswagen.

Раководството на групацијата верува во неговите способности и за него смета дека е чедо на Volkswagen. Кариерата на Зајлаф почнува во Volkswagen во 1990 година каде се до 2003 година напредува завземајќи различни позиции.

Меѓутоа Зајлаф во 2003 година заминува во DamilerChrysler каде работи три години и во 2006 година повторно се враќа во групацијата на Volkswagen, но сега како шеф на дизајн на Audi.

Штефан Зајлаф е одговорен за обликот на поголемиот дел од актуелната гама на модели на Audi, a како негови изворни чеда се А1, А7 и Q3. Зајлаф исто така е одговорен за новиот дизајнерски јазик на Audi.

Имено негови се новата агресивна маска на Audi и впечатливите светла LED кои ги прават моделите на марката толку посебни и препознатливи. Едно од последните дела на Зајлаф е ентериерот на новата генерација на Audi A3.

За него се смета дека претставува вистинска револуција во создавањето на ентериери кај возилата, а за што всушност станува збор ќе можеме да видиме во текот на следната година кога премиерно ќе биде прикажан Audi A3.

Но, што станува со наследникот на Зајлаф не се знае. Во моментот нема информации за новиот шеф на дизајн на Audi.