Најавен уште минатата година автомобилот мораше да помина низ долга фаза на опсежни тестирања кои на крајот потврдија дека станува збор за успешна конструкција и дека Codatrоnca може да влезе во сериско производство.

Првата верзија ќе го носи името Codatronca TS акроним за Turismo Sportivo и ќе биде задвижувана од атмосферски V8, се разбира, бензинец кој ќе остварува моќни 600 коњски сили способни да го истуркаат автомобилот до максимална брзина од преку 340 km/h.

Светската премиера е закажана за 24 април на салонот во Монако, кон средина на годината стартува и производството. Се очекува подоцна да се појави уште една поспортска верзија на Codatronca TSS или Turismo Super Sportivo која во моментов е во фаза на тестирање.

Според конструкторите тајната на успехот на Codatronca лежи во нејзината лесна структура, ефикасна аеродинамика и одлични возни својства. Приоритет при создавањето на Codatronca бил да се конструира супер автомобил кој ќе ги оживее сеќавањата на вистинските италијански спортски класици.

А за да се задржи цената во разумни граници Codatronca e поставена на платформата на Corvette, но со значителни подобрувања во областа на суспензијата, аеродинамиката, сопирачките, моторот и менувачот.

Производството на Codatronca го презвзема нова компанија сместена во Торино, SpadaVettureSport, создадена само за таа цел и под раководство на семејството Спада, а во соработка со неколку технички и комерцијални партнери на Spada кои ќе ја имаат улогата на добавувачи на делови и компоненти.

Цената за сега останува непознаница. Но, очекуваме да биде објавена по претставувањето во Монако.