Под хаубата бревта 3.6 литарскиот атмосферски V6 кој произведува 296 коњски сили и максимален вртежен момент од 350 Nm. Моќноста до сите четири тркала се испраќа преку шест степен менувач DSG, а системот 4Motion го распределува вртежниот момент кон онаа оска која има повеќе тракција.

Спринтот до 100 km/h трае само 5,6 секунди, додека максималната брзина е електронски ограничена на 250 km/h.

За да се разликува од останатите моделски варијанти Passat R36 доаѓа со леснометални бандажи од 18 инчи зад кои се сокриваат огромни сопирачки дискови и сопирачки клешти обоени сино. Каросеријата е приближена до подлогата за 20 милиметри, однапред се разликува по хромираната маска карактеристична за серијата R на VW и биксенон светла кои доаѓаат сериски.

Одзади го красат дуплите издувни цевки и дискретниот спојлер и секако неизоставниот беџ R36. Внатре купувачот наоѓа спортски седишта и волан зад кого се сокриваат палките за менување на брзини кога DSG е во мануелен модус на работа.

Ознаката R обилено е искористена во кабината и се наоѓа буквално на секаде од бројачите на инструмент таблата и праговите на вратите до деталите од четкан алуминиум на арматурата и централната конзола.

Цената за Passat R36 се очекува да стартува од околу 50.000 европски банкноти за седанот, а Variant би чинел околу 1.500 евра повеќе.