Од Волфсбург новата генерација на Polo ја нарекоа голем штедливец, пред се заради големата заштеда во тежина 7,5% во однос на својот претходник и покрај тоа што значително го надминува во димензии.

Понатаму штедливоста доаѓа од новиот седум степен менувач со две спојки DSG и од моторната понуда. Во првата година од претставувањето, во Polo, ќе работат вкупно четири бензинци и три дизели.

Од нив дури пет се комплетно нови мотори и премиерно ќе се докажат во Polo пред да бидат вградени и во останатите модели на групацијата. Една од најголемите новини од под хаубата е новата генерација на турбо бензинец со мала зафатнина.

Станува збор за 1.2 литарски TSI мотор со турбо натполнење и директно вбризгување кој ќе испорачува 105 КС со просечна потрошувачка од 5,5 L/100 km и емисија на СО₂ од 129 g/km што е за 19% пониска вредност од актуелниот атмосферски 1.2 литарец. Овој мотор ќе го задвижува и основниот модел на Skoda Yeti и во малиот SUV на Polo кој се очекува во иднина.

Малите турбо дизели TDI го отфрлуваат системот пумпа-бризгалка и за првпат во Polo ќе бидат напојувани од комон-реил систем што ги прави поефикасни и порафинирани.

Потенцијалот на новите TDI мотори што ќе работат во Polo највеќе се огледува во 1.6 TDI кој остварува 90 КС и во комбинација со пакетот BlueMotion е способен да оствари просечна потрошувачка од 3,8 L/100 km и емисија на СО2 од 96 g/km.

Од VW истакнуваат дека пакетот BlueMotion ќе биде на располагање со секое од трите нивоа на опременост Trendline, Comfortline и Highline. Карактристично за секое од трите нивоа на опременост е стандардната електронска контрола на стабилноста ESP.

Бзбедноста дополнително е нагласена со зајакнатата структура на патничкиот кафез која без проблем треба да му обезбеди на Polo највисока оцена на EuroNCAP од 5 ѕвезди.

Структурата на патничкиот кафез, зоните на деформација и новата генерација од напредни воздушни перници обезбедуваат за 50% повисока заштита на патниците при фронтален удар и 20% при страничен удар во однос на актуелниот Polo.

Новата генерација на Polo доаѓа значително поопремена. Во понудата стои систем за помош при тргнување на нагорнина, комплетен систем од воздушни перници и воздушни завеси, светла за осветлување во свијок, радио систем со интегриран hands-free телефон и навигација, панорамски кров, биксенон светла...

Стартот на производството е закажан за крајот на месец март, додека стартот на продажбата е најавена точно за последната седмица од месец јуни кога Polo ќе биде лансиран во Германија.

Цените сеуште се непознаница и постојат само неверодостојни шпекулации. Тие ќе бидат објавени непосредно пред стартот на продажбата.

Останатите детали како димензиите, перформансите, точната спецификација на нивоата на опременост се очекуваат. Истото важи и за верзијата GTI која е во подготовка.