Раководството на кинескиот концерн SAIC објави дека започнале разговори за купување на шведската марка Volvo која се наоѓа под капата на Ford.

Но, во преговорите за Volvo се вмешува уште една кинеска компанија Changan Automobile Group, која соработува со Ford во Кина. Пoради веќе остварените контакти и добрата соработка се очекува дека Changan Automobile Group има предност кога е во прашање купувањето на Volvo.

Кинескиот дневен весник National Business Daily кој се печати на англиски јазик пишува дека токму Changan Automobile Group е многу блиску до постигнување договор со Ford и превземање на Volvo.

Според весникот веќе имало повеќе средби меѓу челниците на Ford, на Changan Automobile Group и на Volvo на салонот за автомобили во Гуангџоу во текот на ноември, а еден од менаџерите на кинеската компанија во една своја изјава соопштил дека големи се шансите за постигнување договор.

Една од причините за ваквите тврдења е и фактот дека Ford и Changan во својата заедничка фабрика во Кина веќе произведуваат повеќе модели меѓу кои и моделите на Volvo S40 и S80. Патем Changan освен договор со Ford има договор и со Мazda и со Suzuki за производство на нивни модели.

Сепак, без оглед на очигледната предност на Changan, покрај SAIC, за Volvo се интересираат уште неколку кинески производители на автомобили како FAW, Chery и Dongfeng.

Информациите кои доаѓаат од новинската агенција Bloomberg, Ford за Volvo ќе бара 6 милијарди долари. Тоа е за 400 милиони долари помалку од цената што ја плати Ford кога го купи Volvo во 1999.

Тогаш шведскиот производител чинеше 6,4 милијарди долари.

Втората марка која ја сакаат кинеските компании е Hummer. General Motors најави дека Hummer е за продавање и за него веднаш се заинтересира третиот по големина кинески производител на автомобили Dongfeng Motor Group.

Серизоноста во намерата за купување на Hummer, Dongfeng ја потврдува со одобрение добиено од голема инвестициска банка за купување на акции на General Motors.

Иако нема потврда од General Motors дека е во преговори со Dongfeng околу продавањето на Hummer, сепак, компанијата не сокрива дека продолжува да бара купувач.